فى اعراض كتير بتواجهنا نظرا لاننا بنشتغل بادنا كتير و ممكن تكون ادينا اكتر حساسية من ايد ناس كتير، فدة يخلينا قلقانين و بنهتم بيهم اكتر لانها مصدر من مصادر سعادتنا او رزقنا.

اولا قبل اما اجاوبكم على السؤال دة انا مش دكتور و مش دارس الطب البديل، لكن عندى خبرة لانى مريت بمشاكل كتير وجهتنى لانى عازف جيتار محترف لاكتر من 20 سنة فى المهنة، وكمان لتمرسى الالعاب القتالية فى فترة طويلة من حياتى.
حبيت اكون واضح قبل اما اقولكم اجاباتى المبنية بناء تام على تجاربى الشخصية.

انواع الالم فى الايد ثلاث انواع هما: نوع عصبى و نوع عضلى و نوع نفسى.

مشاكل النوع الاول وهو: النوع العصبى

زي ماعضلاتك بتقوى وبيصبها الارهاق الشديد من كتر استخدمك لايدك فكمان الاعصاب بيصبها الارهاق وخاصتا الاماكن الدقيقة، بمعنى ان ممكن تلاقى عندك وجع شديد فى صباعك الصغير مثلا اكتر من اى صباع تانى فى ايدك، فدة معناه ان اعصابك ضعيفة وصبها الارهاق وعاوزة ترتاح وتقوى. اما السبب العلمى ان عندك نقص فى فيتامين ب.

حلها بسيط جدا، اولا اهتم بالاكل الصحى كويس ونومك هيفرق كتير بجانب انك تاخد حبات اسمها نيوروبين ودة انا كنت بخدو شخصيا على شكل حقن لان مفعلها كان اسرع وكمان علشان مشاكل المعدة، اما لو عندك مشاكل مع الحقن فالاقراص برضو كويسة بس مفعلها بطئ شوية.

فيتامين ب هتلاقيله اشكال و انواع علشان كدة حبيت اسبلك اللنك دة تتعمق اكتر فى انواع فيتامين ب

ازاى تقدر تعرف انك مصاب بالنوع العصبى؟
تقدر تعرف من الالم اللى بيصيب المنطقة. النوع دة الالم بتاعو لايحتمل وبيوصل انو يخلى الشخص فى حالة هستيرية وبيظهر فى فصل الشتاء اكتر من اى فصل تانى وبتحس فى شينيور بيخرم فى المنطقة المصابة. وكمان بتحس برعشة فى ايدك، وصوبعك مش ثابتة

متخفش وحافظ على هدوئك واتبع الخطوات التالية. فى اقل من اسبوع هتخف.

خطوات علاج النوع العصبى:

حافظ على نظام غزائى صحى

خد فيتامين ب

اعمل مساج دائم للمنطقة المصابة

مشاكل النوع التانى وهى: النوع العضلى

العضلات بتكتسب خبرات جديدة وكل مرحلة بناء بيحصل عملية تمزيق للعضلات الضعيفة وبتتكون عضلات اقوى منها. الالم دة بيكون قوى جدا عند اشخاص واشخاص تانى بيستحملوا. لكن سعات كتير العضلات بتكون محتاجة لراحة وتدليك علشان تقدر تكمل.

حل مشاكل وجع العضلات بسيط جدا، ريح ايدك كام يوم وحافظ على تدفيتها، وكمان لو قدرت تعملها ماساج بمية دافية يوميا ايدك هتشكرك وتقولك كتر الف خيرك.

ازاى تقدر تعرف انك مصاب بالنوع العضلى؟
من الم المصاحب لايدك وديما هتلاقى تمركز الوجع فى العضلات، زى عضلت الساعد وعضلة الكتف.

خطوات علاج النوع العضلى:

ابعد فترة عن مجال شغلك اللى سببلك المشاكل العضلية

حافظ على المساج اليومى

اعمل تمارين اطالة كل صباح

النوع الاول و التانى ممكن يجولك مع بعض من كتر ما انت بتزاول مهنتك وبتشتغل بايدك كتير فايصيبك الارهاق العصبى و الارهاق العضلى ودول حلهم انك تاخد فترة راحة مع مراعات انك متحملش على ايدك كتير.

فى الفترة اللى كنت بلعب فيها اللعاب قتالية كان ديما المدرب يقلى استحم بميه سخنة وادهن المكان البيوجعك زيت كافور ولفها كويس، كنت بعمل كده لان مكنش ينفع اخد مسكنات او اى ادوية لسبب مشاكل فى المعدة و انى مش هقول لدكتور معلش اصل ايدى بتوجعنى هاتلى كاتافلام!

مشاكل النوع التالت و الاخير وهو: النوع النفسى

محدش بياخد بالو من المشكلة دى الا لو حسيت فجأه باكتاب وضعف عام فى الجسم وكان جسمك مش عاوز يطاوعك ويعمل اللى انت عاوزة، كتير مننا بيرهق نفسو فى شغلو وبينسا نفسو انها كمان ليها عليه حق، عاوزة تتبسط وتخرج وتسافرعلشان حست بملل من الروتين اليومى.
المشكلة دى فى اهملها بتكون ليها عواقب وخيمة وهى فقدانك للرغبة فى العمل نهائى وممكن تزهق من شغلك بدون سبب منطقى، ممكن يكون حالتك المادية بسبب شغلك متيسرة لكن الحالة المزاجية او النفسية ماثره جامد عليك وعلى حالتك الجسمانية والعضلية والعصبية كمان.

اكيد حسيت ان كلامى جة على الجرح، معلش كلنا بنقع فى المشكلة دى بسبب ظرفنا المادية بس صدقنى هيفرق كتير جدا معاك فسحة بسيطة ولو لوحدك كنوع من انواع المكافأه.

معرفتنا لجسمنا كويس هيخلينا ديما فى القمة ومتشبعش شغل وانتاج.

اتمنى ليكم ديما الصحة والعافية. ديما كانو بيقولوهلنا واحنا صغيرين الوقاية خير من العلاج، أما لو لقيت ان كلامى بعد اما جربتو مجبش نتيجة ارجو زيارة طبيب فى اسرع وقت.

خطوات لو اتبعتها هتقلل اصابتك

اولا حافظ على مواعيد نومك

ثانيا مارس رياضة حتى لو بشكل بسيط وهى الجرى نصف ساعة يوميا

ثالثا متنساش قبل متشتغل اعمل عملية اطالة هيفرق معاك كتير

اتمنى ان تكون المعلمات دى مفيدة ومتبخلش بانك توصلها لغيرك ممكن يستفاد منها كتير
شكرا ليكم و اشفكم بعديـــــــــــــــــــن