أهمية ارتفاع مايكات الجيتار وتعديل زويته | المزيكاتى

"مبروك اشتريت جيتار غالي!"-

اه، احسن بكتير من الأول.

-و هو الأول كانت ايه مشكلته؟!

كان رخيص و صوته وحش.

-طيب سمعنا ده كدة!

"ايه ده صوته مش حلو اوي برده!"

طيب باختصار ده كان الحوار الطبيعي لاي حد فاكر انه ميقدرش يحسن صوت جيتاره بنفسه و لازم يشتري واحد غالي، و كتير بيتفاجؤوا انهم ممكن يدفعوا اقل من كدة بكتير عشان يوصلوا للصوت اللي بيحبوه و نفسهم فيه، و في كمان ناس اكتر بتخاف تلعب في الجيتار و يحسوا انهم بوظوه.

افتكر معايا كدة لما تكلمنا زمان عن المهندس اللي عمل جيتار كهرباء !
مش فاكر ؟! ولا مقريتش ؟!

  بسيطة..ارجع راجع البلوج اللي قبل ده..و متنساش بقى تتابع كل جديد و متسيبش حاجة عشان كله هيفيدك. ومرتبط ببعض

نرجع بقى لموضوعنا..سيبك من الفلوس خالص دلوقتي ..تعالى نشوف طريقة من غير ما تدفع أي حاجة، و طبعا ده هياخدنا على فين؟!

على الحلقة الأولى من المزيكاتي!

ساعات كتير بتفكر ليه صوتك مش حلو ؟

نفسك تغني زي فلان مثلا بس ديما نشاز! 

و ساعات بتسرح بخيالك و تفتكر نفسك بتغني وسط جمهور و الناس كلها مبهورة بصوتك !

إحساس جميل .. مش كدة؟!

بس المشكلة في الموهبة والتدريبات و الدراسة و حاجات كتير بتدخلك في موج بحر المزيكا و انت بالنسبالك مش فارقة كل الحاجت دي انت عايز تغني و خلاص مش هتعمل دكتوراه !

طب ركز معايا كدة..فكر في انك فجأة صوتك بقى روعة..و الناس كلها بتستغرب لما تسمعك ..فكر انك مثلا عندك زرار سحري كدة لما تدوس عليه صوتك يبقى شبه المغني فلان و تدوس تاني يبقى صوتك مختلف خالص  !!

"ايه الجمال ده!"

هي دي الجملة بالظبط اللي انا و انت فكرنا فيها و احنا بنتخيل مع اختلاف الالفاظ طبعا :D

طيب، طالما الموضوع طبع حلو تعالى اقولك الموضوع ده هياخدنا لفين..هياخدنا لرحلة بعيدة في الزمن و نشوف مين فكر زيننا و قال ايه الجمال ده!

يلا بينا ! جاهز!

يلا بينا على الحلقة الأولى من المزيكاتي ! 

الرحلة بتبدا مع عازف جيتار بيلعب الجيتار العادي و الوحيد وقتها و اللي معروف باسم الفولك او الاكويستك، و الجيتار ده مجرد الشكل العادي اللي كلنا متعودين عليه و في مرة اتقابل مع مهندس كهرباء و فكروا فكر بديهي بالنسبالنا بس وقتها كان منتهى العبقرية، و هو ليه منخليش الجيتار ده يشتغل بالكهرباء فيدينا صوت احسن و اعلى و اقوى، طبعا مع تثبيت شوية مبادئ علمية ليها علاقة بالمجال الكهربي و الاهتزازات و الحاجات اللي ملناش دعوة بيها دي .. عملوا فعلا جيتار كهرباء و مع مرور الوقت بدأت الناس فكرها و ذوقها و خيالها يتطور و ناس كتير اضافت في المجال ده  سواء بصوت زيادة، مؤثرات صوتية، بدالات جيتار، و كل حاجة صغيرة و كبيرة ليها علاقة بالجيتار.

مين الناس دول بالظبط؟! و الكلام ده حصل امتى؟!
في اسامي كتير .. و في الحقيقة المزيكا و التطور اللي عملوه يستحق انه يتنسب لاكتر من شخص في اكتر من وقت.

طيب و بعدين؟! لو صوت الجيتار وحش هنعمل ايه ؟!
انا هسأالك لو صوتك انت وحش هتعمل ايه ؟!

هتكح..و لو وحش اكتر هتعليه و تظبطه اكتر .. و لو وحش اكتر هتاخد دوا..و لو وحش اكتر ؟!

يمكن انت نفسك بتستخدمه في أماكن تطلعه وحش مثلا؟!

عمرك فكرت انك ممكن تكون بتستخدم صوتك غلط؟! 

وسعت شوية صح؟!

طب تعالى نشوف لما الجيتار صوته يكون وحش و احنا عندنا زراره السحري و اللي هو اكيد المايك اللي بيطلع الصوت ده ..هنعمل معاه ايه ؟!

شوف كل ده بتفاصيل احلى و اكتر في الحلقة الأولى:

و دي #لسة_البداية💪

  

 

باختصار شديد جدا، أنواع المايكات في الجيتار نوعين:

1-Single Coil.

و ده النوع اللي من اسمه كدة بيبقى لوحده فصوته بيكون اخف..و مشهور جدا في Stratocaster & telecaster shapes.

2-Humbucker.

وده النوع اللي خلينا نقول عليه اقوى بحكم انه يعتبر اتنين فرديين مع بعض زي ما في الLes paul & SG shapes.

طيب هو ده بس اللي بيختلف؟! يعني النوع بس ؟!

لا في الحلقة دي بقى هتشوف حاجات اكتر و تفاهيل اهم..زي زاوية و ارتفاع المايك نفسه و لما يكون عندك اكتر من مايك في اكتر من مكان في الجيتار، هتتعامل معاهم ازاي؟!

1-ارتفاع المايك :طبعا كل لما المايك كان عالى و قريب من الاوتار، كل لما هيكون الصوت ضخم و مش مظبوط اوي لانه من الاخر بياخد كل حاجة و كل الترددات بالظبط و ده مش هيخليك تحب الصوت او تحس انه نشاز شوية..او انت و زوقك.

بس يفضل انه يبقى مش مرتفع اوي و بعيد على الاوتار نسبيا..عشان تقدر توصل للتون الذهبي.

2-زاوية المايك: بعد لما ظبطت الارتفاع، حسيت انه انك عايز ترفعه من حتة و تنزله من حتة تاني، هنا بقى تبقى أهمية الزاوية للمايك عشان تظبط التون بتاعه من كل الارتفاعات بالنسبة للاوتار.

3-بعد ما ظبط الزاوية و الرتفاع ،نيجي بقى لحاجة مهمة و سؤال بديهي، هتلعب بانهي ؟!

دي حاجة بترجع لارتياحك في درجة رفع الصوت، سواء عايزه قريب من رقبة الجيتار فيكون الصوت عريض، او عايز تقرب تحت اكتر عند ال bridge و ساعتها الصوت بيكون اعلى وحاد او ارفع.

4- طيب احنا اتفقنا كدة على كل حاجة؟!

لا لسة حاجة بسيطة بتفرق في أنواع المزيكا و طعمها و احساسها و كل حاجة و هي ال Tone controllers.

 دول بيتحكوا في الصوت يكون مقفول مثلا و غامق او عريض شوية، او مفتوح و بيرن اكتر .. يعني برده نقدر نقول انه بشكل ما بتقدر تتحكم في ال Treble بتاع الجيتار.

و بكدة بشكركوا لو بتقروا لغاية هنا و كدة اهم المعلومات عن المايكات، بس استنى دي مش كل حاجة عن التون !
تابعوا المزيكاتي و كل الحلقات عشان تعرفوا ازي تفضلوا مكملين في رحلة المزيكاتي للصوت الذهبي للجيتار.

خشوا على يوتيوب و شوفوا قناة المزيكاتي - elmazekaty.

ولو مش عارفين تشوفوا الحلقات هتلاقوها في البلوجات اللي فاتت، و دي صور من الحلقة الالى للمزيكاتي.

نتمنى تكونوا استفادتوا و ديما تبقوا فاكرين ان دي #لسة_البداية 💪

اشوفكـــــــــــــــــــــــم بعديــــــــــــــــــن

#المزيكاتى #البحث_عن_الصوت_الذهبى #elmazekaty #jamesmassi