كل اللي محتاج تعرفة و انت رايح تشتري جيتار

رايح تشتري جيتار جديد و خايف تشتري جيتار ميطلعش اللي كنت بتحلم تشترية؟

اشتري انهي جيتار، و انهي سعر؟ 

خايف تدفع كل الفلوس اللي وراك و قدامك، في جيتار يطلع في عيوب كتير! خايف تطلع خدمة ما بعد البيع رديئة و يشيلوك الليلة لو الجيتار في عيب؟

كل الاسئلة دى و غيرها بتدور في دماغك قبل ما تشتري جيتار جديد؟

متقلقش الحل بتاعك هيكون في المقال دة، بس متزهقش بسرعة و تقرا كلمتين و تمشي، خليك صبور و كمل للاخر علشان تاخد المعلومة للاخر.

تعالي نحل الموضوع دة باننا نبتدي نسال الاسالة الصح! 

زى مثلا:- انا عاوز اعزف نوع مزيكا ايه؟

السؤال دة لو عرفت تجاوب علية نص المشكلة اتحلت! تعالي اقولك ازاي

هنقسم الاجابة الي ثلاث مراحل، وهما لو انت عاوز تعزف كلاسيك، او عاوز تعزف روك و مشتقاتة، او فولك ميوزك.

كل واحد من الثالث اختيارات لية اجابة خاصة و كمان هتلاقي حاجات مشتركة بينهم كتير، اختار الاجابة اللي تناسب نوع مزيكتك.

موسيقي الكلاسيك

لو انت من محبي موسيقي الكلاسيك، او الجازو الروقان يبقي الكلاسيك جيتار الاختيار الانسب ليك

موسيقي الروك و انواعه

لو انت من محبي موسيقي البلوز، روك، والميتال

و من النوع اللي بتحب اصوات الدستورشن و الاوفردرايف، يبقي الاختيار دة الانسب ليك

موسيقي الفولك

لو انت من محبي موسيقي الكانتري، و الفولك يبقي الاختيار دة الانسب ليك

القسم الاول

 الكلاسيك جيتار او الفولك جيتار

تعالي اقولك بقا الخطوات اللي المفروض تعملها الاول قبل ما تروح اي محل

شوف الميزانية بتاعتك الاول ماشيا مع انهي فئة، ديما الجيتارات بتتقسم الي فئة (مبتدأ، متوسط المستوي، محترف او هاوي) حدد جيتار او اتنين من كل الجيتارات اللي شفتهم مناسب للميزانية

خش زاكر الجيتارين علي اليوتيوب كويس و اسمع صوتهم، و شوف المقارنة بينهم، و متقولش اليوتيوب مش مرجع، لا مرجع و لولاة مكنتش الشركات تدفع فلوس كتير علشان تبعت منتجاتها لعازفين محترفين يعملولك بيها فيديوهات مزيكا علشان تقرر تشتري أية

أسال واحد من صحابك او المدرس بتاعك يكون فاهم في الجيتارات، و خد راية في الجيتارين دول

.بكدة يا عزيزي تقدر تقول انك جمعت كل المعلومات اللي ممكن تحتاجها و انت رايك المحل، زي مثلا نوع الخشب، كام فريت، نوع صندوق الجيتار و غيرة، كل المعلومات دى هتلاقيها فى فيديوهات اليوتيوب!

تيجي بقا للنقطة المهمة اروح انهي محل اشتري منة، اجيب جديد وال مستعمل؟

اولا:- لو انت رايح تجيب جديد، الزم المحل اللي تروحة يكون موثوق فية و خاصتا خدمة مابعد البيع ايوة عليك نور اللي زكرتهالك فوق، ماشاء الله عليك و انت مركز و مصحح معايا كدة

خليني اقولك كام محل انا شخصيا اثق فيهم، لاني بتعامل معاهم كتير بس في اخر المقال

تعمل اية بقا في المحل اما تروح؟

كلم المحل الاول اسال علي الجيتارين، و سعرهم، وقارنه بالاسعار اللي علي النت

خليك واثق في نفسك و في معلوماتك اللي تعبت في تجمعها علي الجيتارين

خش اسال بكل ثقة علي الجيتارين لما تروح المحل، و اسالهم بكل ادب انهم يسمحولك تجربهم

جرب واحد واحد فيهم كويس وبص علي ( مسطرة الجيتار شوف لو كانت معوجة، يبقا هتلاقيها بتزن في الفريتات، علو الاوتار من المسطرة و صندوق الجيتار، نعومة الفريتات من احرف المسطرة) الحاجات دي مش سببها الحل، بيكون السبب عدم الاهتمام من الشركة المصنعة، او سوء تخزين

لو كلة تمام في الاتنين، مفيهمش اي مشاكل، جربهم تاني و شوف اكتر واحد اقربلك و حاسس ان هو دة جيتارك، من غير تفكير اتبع حدثك

قررت خلاص انك هتشتري الجيتار دة، اسال عن السعر تاني، و اسال ازا كان المحل بيقدم شنطة جيتارمعاة كا هدية او لا

أسالهم بكل ادب لو في اي مشكلة في الجيتار لقيتها هل عندكم خدمات صيانة؟ اكيد الاجابة هتكون ايوة عندنا يافندم

ادفع فلوسك و اسال علي الفاتورة قبل ما تمشي

طيب لو افترضنا انك عاوز تشتري جيتار كلاسيك بيتوصل، علشان حبة شقاوة كدة و انت بتعزف عند زميلك او في حفلة صغيرة توصلوا و تسمع الجيران

هقولك تعمل اية، بالاضافة لكل النقاط اللي فوق اللي هما 

( مسطرة الجيتار شوف لو كانت معوجة، يبقا هتلاقيها بتزن في الفريتات، علو الاوتار من المسطرة و صندوق الجيتار، نعومة الفريتات من احرف المسطرة) زود عليهم شوف نوع المايك (غالبا بيكون فيشمان) شوف ازا كان في بطارية او لا (لو مفيش قولهم يجبولك بطارية، هو بيجي من برة بالباطارية بتاعتة، معظم المحلات بتشيلها علشان متصديش و تبوظ الدايرة اللي جوا) شغلة و جرب التيونر و جرب صوتوا علي امب مخصص لي كلاسيك او اكوستك جيتار، خبط علي الصندوق و اسمع لو في صوت شخللة من جوة متخدوش وهات واحد تاني غيرة

شوف الوصلة اللي بيخش فيها السلك مهزوزة او لا

و انت ماشي اسال ازا كان الجيتار معاة الوصلة بتاعتة، معظم الوقت بيجي الجيتار بالوصلة بتاعتة و خاصتا لو من الفأة المبتدأ او المتوسط

القسم الثاني

الاليكتريك جيتار

زي ما قولتلك ان في حاجات كتير هتتكرر في التفاصيل لانهم جيتارات، بيختلف فيهم حاجات بسيطة في التفاصيل

اولا:- لازم تكون عارف ان الجيتار الاليكتريك انواع و فئات منها (المبتدأ، المتوسط، المحترفين أو الهواة ودي ديما بتكون الاغلي)

ثانيا:- الجيتارات الاليكتريك مش ممتعة لو هتشتريها لوحدها، يعني بعد اما تجيبها لازم تشتري حاجات تاني زي مثلا (مالتي افيكت او بيدالز) (هتستخدم الجيتار علي الكومبيوتر وتجيب برامج محاكاة للامبات او هتشتري امب)

كل دول حاجات لازم تحطها في دماغك قبل ما تشتري الجيتار لانها مهمة جدا زيها زي الجيتار

حددت ميزانيتك، و جاهز تشتري الجيتار بالكاماليات بتاعتة، يلة بينا، تعالي اقولك تعمل اية قبل ما تروح المحل تشتري

اولا:- خش شوف الجيتارات اللي ماشية مع ميزانيتك، حددلك جيتار او اتنين

ثانيا:- زاكر الجيتارين كويس جدا علي اليوتيوب

ثالثا:- استشير زميل ليك أو مدرسك في الجيتارين دول، هيقولك رايه، بس برضوا مش شرط ان يكون رايهم صح، بس دي حاجة بتضيفلك معلومات علشان تكونها قبل ما تروح المحل

خلصت كل النقاط دي وجاهز، النقطة البعديها هي انك تروح المحل

لو امكن خد واحد من صحابك اللي بيعزفوا الجيتار علشان يجربة معاك، لو ما امكنش يبقا ركز في الكام نقطة دول

اولا:- كلم المحل علي التليفون او الموقع بتاعهم، اسال علي الجيتارين، و اسال علي سعرهم، و شوف ازا كان ماشي مع اللي شفتة علي النت او لا

ثانيا:- روح زور المحل اللي كلمته، خش بكل ثقة، اسال علي الجيتارين

ثالثا:- امسك جيتار فيهم و اطلب انك توصلة بامب علشان تسمع صوتة

ثالثا:- وصل الجيتار و ابتدي اعزف و ركز علي بعد مسافة الاوتار عن المسطرة، لو انت مش بتعرف تعزف لسة، بص بعينك علي الفرق في المسافة بين الاوتار ورقبة او مسطرة الجيتار

رابعا:- بص علي جسم او صندوق الجيتار و شوف لو في خبطات او اي حاجة حسيت انها مديقاك قلة عليها و شوف الجيتار التاني

خامسا:- دي حاجة مهمة جدا، خالي بالك و انت بتبص علي رقبة الجيتار بص من ظهرها و شوف كويس الخشب، لو حسيت ان في شرخ و لو بصيط او الرقبة خشنة من ظهرها، ابعد عن الجيتار و شوف التاني

سادسا:- لما تشغل الامب، او سماعة الجيتار، خليك علي الكلين، و اسمع كويس صوت الجيتار، شوف لو في زنة كبيرة يبقا في مشكلة و ابعد عنة، ملقتش، جرب افيكت الامب و خش علي التقيل و ارزع الاوفر درايف يامعلم، و اسمع كويس صوت الجيتار مع زنة الامب، لو لقيت الزنة اعلى من صوت الجيتار يبقا في مشكلة

سابعا:- جرب كل المايكات بتاعت الجيتار، السويتش كل واحد لوحدة و اعزف شوية

و اخر نقطة لو استقريت علي جيتار، و خلاص هتشترية، اسالهم هل ينفع تعملولي عرض الجيتار و الامب بسعر مخفض؟

دة لو انت حابب تشتري امب، و نصيحة مني هات امب حتي لو صغير للتمرين

حاجات مهمة، لو لقيت الاوتار في اي نوع من الجيتارات اللي حابب تشتريها مصدية او في اماكن متغير لونها شوية، من حقك تطلب تغيرهم من المحل

لازم تجيب فاتورة فيها مواصفات الجيتار و كل تفاصيل البيع، علشان لا قدر الله حاجة حصلت يكون عندك دليل تقدر ترجع الجيتار، بس لازم تاني يوم بحد اقسي، علشان تضمن انهم يرجعهولك